(سبه‌ی)پاش ئه‌وه‌ی که‌ریم بنزیمه‌ به‌ ره‌سمی چوه‌ یانه‌ی ریاڵ مه‌درید، یانه‌ی لیۆنی فه‌ره‌نسی ده‌یه‌وێ ڤان نیسته‌ڵڕۆی هێرشبه‌ری یانه‌ی ریاڵ مه‌درید بۆ جێگره‌وه‌ی بباته‌ ریزه‌کانییه‌وه‌.
رۆژنامه‌ی مارکای ئیسپانی رایگه‌یاند: "جان میشال ئۆلاسی سه‌رۆکی یانه‌ی لیۆن داوای له‌ پیرێزی سه‌رۆکی یانه‌ی ریاڵ کردوه‌، نیسته‌ڵڕۆی که‌ وه‌رزی داهاتو به‌هۆی پێکانه‌وه‌ یاری نه‌کرد، په‌یوه‌ندی به‌ یانه‌ی لیۆنه‌وه‌ بکات".
رۆژنامه‌که‌ ئاماژه‌ی به‌وه‌شکردوه‌، لیۆن گرنگیش به‌ کلاس یان هۆنتلاری هۆڵه‌ندی و یانه‌ی ریاڵ ده‌دات، وێڕای ئه‌وه‌ی یانه‌کانی میلان و مان یونایتد هه‌وڵی به‌ده‌ستهێنانی ده‌ده‌ن.
پاش هاتنی کاکاو رۆنالدۆ و بنزیمه‌ بۆ یانه‌ی شاهانه، هه‌لی یاریکردنی نیسته‌ڵڕۆی له‌ وه‌رزی داهاتودا که‌متر ده‌بێته‌وه‌، هاوکات رۆژنامه‌کان ئاشکرایان کردبو، پیرێز ده‌یه‌وێ ده‌ستبه‌رداری یاریزانه‌ هۆڵه‌ندییه‌کانی یانه‌که‌ی بێت. ‌
جێی ئاماژه‌یه‌ نیسته‌ڵڕۆی ساڵی 2006له‌ یانه‌ی مانچسته‌ریونایتده‌وه‌ چوه‌ یانه‌ی ریاڵ مه‌درید، له‌ یه‌که‌م  وه‌رزیشدا 25 گۆڵی بۆ یانه‌که‌ی تۆمارکردو بوه‌ گۆڵکار.